काठमाडौं । काठमाडौंको खुलामञ्चमा रहेको बसपार्कमा बुधबार फलामे बार लगाइएको छ । अस्थायी बसपार्कको रुपमा प्रयोग गर्दै आएको स्थानमा फलामे ढोका लगाइएको हो । योसँगै अब सो बसपार्क पूर्ण रुपमा हट्नेछ ।
पुरानो बसपार्क रहेको स्थानमा काठमाडौं टावर बन्ने भएपछि ५ वर्षअघि सो बसपार्कलाई अस्थायी रुपमा खुला मञ्चमा सारिएको थियो । तर, काठमाडौं टावरको बेसमेन्ट निर्माण सम्पन्न भएपछि बेसमेन्टलाई फेरि बसपार्ककको रुपमा प्रयोग गर्न लागिएको हो ।
अहिलेको अस्थायी बसपार्कमा ४० कम्पनीको ६ सय भन्दा बढी बसले स्टेशनको रुपमा प्रयोग गर्दै आएका थिए । ४० कम्पनीमध्ये २७ कम्पनी छोटो दूरीका निए भने १३ मध्यम दूरीका थिए ।
अस्थायी बसपार्कलाई हटाउन बैशाख ९ गते काठमाडौं महानगरपालिकाले निर्णय गरेको थियो । सो अनुसार बुधबारदेखि बसपार्क हट्न लागेको हो । खुला मञ्चमा रहेका सबै गाडीलाई हटाएर आजै राती ताला लगाइने काठमाडौं महानगरपालिकाले जनाएको छ ।
