काठमाडौं । नागरिक उड्डयन प्राधिकरणले काठमाडौं–दिल्ली उडानको संख्या सातामा २ बाट ६ पुर्याएको छ । प्राधिकरणले साउन ४ गतेदेखि भदौ १५ गतेसम्म दुई देशका वायुसेवालाई सातामा ६ वटा उडान गर्ने अनुमति दिएको हो ।
नेपाल वायुसेवा निगम र भारतीय ध्वजाबाहक एयर इन्डियालाई सातामा ३–३ गरी ६ वटा उडान गर्ने अनुमति दिन लागेको हो । तत्कालीन प्रधानमन्त्री केपी शर्मा ओलीले वैशाख २३ देखि सातामा १४ वटा उडान हुँदै आएको काठमाडौं–दिल्ली उडान दुईवटामा सीमित गरिएको थियो । । अब नेपाल–भारत उडान बिहीबारबाहेक हरेक ६ दिनै हुने छ ।
नेपाली ध्वजाबाहक नेपाल वायुसेवा निगम र भारतको एयर इन्डियाले पुसदेखि दैनिक एक–एक उडान मात्रै गर्दै आएका थिए । लकडाउनको अवधिमा ८ महिना रोकिएको नेपाल–भारत उडानलाई दोस्रो लकडाउनमा मन्त्रिपरिषद्ले बन्दै नगरी सातामा दुईवटा उडानमा सीमित गरिएको थियो ।
दुबै वायुसेवाले नेपाल सरकारले बनाएको स्वास्थ्य मापदण्ड पालना गर्दैैै सेवा प्रदान गर्नेछन् ।
