काठमाडौं । सन् २०२१ मा विश्वको अर्थतन्त्रमा व्यापक सुधार आउने भएको छ । अन्तर्राष्ट्रिय मुद्रा कोष (आईएमफ) ले गरेको पूर्वानुमानमा यस्तो अवस्था देखिएको हो । सन् २०२० मा कोरोनाको कारणले थला परेका मुलुकहरुले यो वर्ष राम्रो आर्थिक वृद्धि हासिल गर्ने आईएमएफको अनुमान छ । बेलायत, अमेरिका र अन्य पश्चिमा मुलुकको अर्थतन्त्र आकलन गरिएभन्दा राम्रो हुने आईएमफले जनाएको छ ।
आईएमफको अर्धवार्षिक वर्ल्ड इकोनोमिक आउटलुक (डब्लूईओ) मा कोरोना भाइरसविरुद्धको खोप अभियान, चुनौतीका बीच व्यवसायको निरन्तरता र अमेरिकामा कोरोनाको प्रभावबाट माथि उठ्न जो बाइडेनले छुट्याएको प्याकेजका कारणले विश्व अर्थतन्त्रममा व्यापक सुधार हुने बताइएको छ ।
२०२१ मा विश्व अर्थतन्त्र ६ प्रतिशत र सन् २०२२ मा ४.४ प्रतिशतले वृद्धि हुने प्रक्षेपण गरेको छ ।कोरोना भाइरसका कारण सन् २०२० मा सबैभन्दा बढी प्रभावित भएको बेलायती अर्थतन्त्र सन् २०२१ र २२ मा भने माथि उठ्ने आईएमएफको अनुमान छ । यो वर्ष बेलायतको आर्थिक वृद्धि ५.३ प्रतिशत र सन् २०२२ मा ५.१ प्रतिशत हुने आईएमएफको प्रक्षेपण छ ।
त्यस्तै अमेरिकाको अर्थतन्त्र सन् २०२१ मा ६.४ र सन् २०२२ मा ३.५ प्रतिशतले वृद्धि हुने आईएमफको अनुमान छ ।
चीनको अर्थतन्त्र सन् २०२१ र २२ मा क्रमश ८.४ प्रतिशत र ५.६ प्रतिशतले वृद्धि हुने अनुमान छ । त्यस्तै, भारतको आर्थिक वृद्धिदर १२.५ प्रतिशत पुग्ने अनुमान आईएमएफले गरेको छ । यसअघि आईएमएफले भारतको अर्थव्यवस्थामा यो वर्ष ७.५ प्रतिशतको वृद्धि हुने अनुमान गरेको थियो । त्यस्तै सन् २०२२ मा भारतको अर्थतन्त्र ६.९ प्रतिशतले वृद्धि हुने अनुमान गरिएको छ ।
न्यून आय र विकाशशील मुलुकको अर्थतन्त्र सन् २०२१ मा ४.३ प्रतिशत र सन् २०२२ मा ५.२ प्रतिशतले वृद्धि हुने अनुमान छ । आईएमएफकी प्रमुख अर्थशास्त्री गीता गोपिनाथले सन् २०२१ मा विश्वका अधिकांश मुलुकको अर्थतन्त्रमा सुधार आउने देखिनुको मुख्य कारण कोरोना भाइरसविरुद्धको खोप अभियान भएको बताइन् ।
