काठमाडौं । नेपालमा सबैभन्दा धेरै सवारीसाधन र पार्टपुर्जा भारतबाट आयात हुने गरेको छ ।
गत वर्ष ५८ अर्ब ८० करोड रुपैयाँ बराबरको सवारीसाधन र पार्टपुर्जा भारतबाट आयात भएको थियो।
यस वर्षको पहिलो ९ महिनामा भारतबाट ७८ अर्ब ४८ करोड रुपैयाँको सवारीसाधन र पार्टपुर्जा आयात भएको देखिन्छ ।
गत आवको तुलनामा यस आवमा ३३ प्रतिशतले वृद्धि भएको हो ।
नेपाल राष्ट्र बैंकको तथ्यांक अनुसार चालु आर्थिक वर्षको पहिलो ९ महिनामा ९५ अर्ब ५४ करोड ९९ लाख रुपैयाँ बराबरको सवारीसाधन, पार्टपुर्जा र टायर आयात भएको छ ।
जुन गत वर्षको सोही अवधिको तुलनामा २६.९ प्रतिशतले बढी हो । गत वर्ष सोही अवधिमा ७५ अर्ब २७ करोड १३ लाख रुपैयाँको सवारीसाधन, पार्टपुर्जा र टायर आयात भएको थियो ।
कोभिड–१९ को प्रकोपका कारण उपभोक्ताहरु सार्वजनिक सवारीसाधनमा भन्दा निजीमा आकर्षित भएका छन् ।
बैंकहरुले सस्तो ब्याजदर र सहज फाइनान्सिङको व्यवस्थाले गर्दा निजी सवारी चढ्ने बढिरहेका छन् ।
यातायात व्यवस्था विभागको अनुसार आर्थिक वर्ष २०७६÷७७ मा मुलुकभर करिब ४० लाख सवारी दर्ता भइ सञ्चालनमा रहेका छन् ।
जसमा दुई पांग्रेले ८० प्रतिशत बजार ओगटेको छ ।
