काठमाडौं । स्वास्थ्य तथा जनसंख्या मन्त्रालयले मंगलबार नेपालमा ‘भारतीय भेरियन्ट’को कोरोना भाइरस फैलिएको पुष्टि गरेको छ ।
शुक्रराज ट्रपिकल तथा सरुवा रोग अस्पतालले परीक्षण गरिएको नमुनामध्ये ९० प्रतिशतमा भारतीय भेरियन्टको कोरोना भेटिएको जनाएको छ ।
यो भेरियन्ट सबै उमेर समूहमा धेरै संक्रामक र जोखिमपूर्ण रहेको अध्ययनहरुमा पाइएको स्वास्थ्य मन्त्रालयले जनाएको छ ।
अहिले आएको नयाँ भाइरस अन्यको तुलनामा आक्रामक र बढी घातक मानिएको छ ।
युके भेरियन्टभन्दा अझै तीब्र गतिमा फैलिने र यसले सबै वर्ग र उमेर समूहका व्यक्तिलाई असर गर्नेछ ।
यसले बन्द कोठामा बसेको एउटा संक्रमितले सयौंजनासम्मलाई एकै मिनेटमा भाइरस सार्न सक्ने खालको रहेको छ ।
यो भाइरसले ६०,६५ वर्षका ज्येष्ठ नागरिकदेखि ३,४ वर्षका बच्चासम्म सबैलाई असर गर्ने र कोरोना भाइरस विरुद्धको खोप लगाइसकेकोमा यसको असर कम देखिने छ ।
नयाँ भेरियन्टको भाइरस धेरैमा प्रसार हुने, संक्रमितमा धेरै लक्षण देखिने र यसले मान्छेलाई मृत्युको मुखसम्म लैजाने चरित्रको छ । जुन अघिल्ला भेरियन्टको तुलनामा बढी घातक मानिएको छ ।
