काठमाडौं । दुई कम्पनीको लाभांश सुरक्षित गर्ने आज अन्तिम दिन रहेको छ । जीवन विकास लघुवित्त र नेपाल टेलिकमले प्रस्ताव गरेको लाभांश सुरक्षित गर्ने आज अन्तिम दिन रहेको हो ।
यी कम्पनीले प्रस्तावित लाभांश पारितका लागि वार्षिक साधारणसभाको मिति तय गरि उक्त सभा प्रयोजनकालागि जिवन विकास लघुवित्त चैत १२ गतेदेखि २५ गतेसम्म र नेपाल टेलिकमले चैत ११ गतेदेखि २३ गतेसम्म बुक क्लोज गर्ने निर्णय गरेका छन् । चैत ११ र १२ गते नेप्सेमा कारोबार नहुने भएकाले चैत १० गतेसम्म कायम भएका शेयरधनीहरुले मात्र सो लाभांश लिन र उक्त सभामा सहभागि हुन पाउँनेछन् ।
जीवन विकास लघुवित्तको चुक्त पुँजीको ७० प्रतिशत बोनस शेयर र कर प्रयोजनका लागि ३.६८ प्रतिशत नगद लाभांश वितरणको प्रस्ताव पारित गर्न चैत २५ गते साधारणसभा बोलाएको छ। सो सभा प्रयोजनकोलागि चैत १२ गते बुक क्लोज गर्ने निर्णय गरेको छ ।
त्यस्तै, नेपाल टेलिकमको ४० प्रतिशत बोनस शेयर र कर प्रयोजनका लागि समेत २० प्रतिशत नगद लाभांश वितरणका प्रस्ताव पारितको लागि चैत २४ गते साधारणसभा बोलाएको छ । सो सभा प्रयोजनकोलागि कम्पनीले चैत ११ गते शेयरधनी किताबखाता बन्द गर्ने निर्णय गरेको छ ।
यस अनुसार चैत १० गतेसम्म कायम भएका शेयरधनीहरुले यी कम्पनीहरुको साधारण सभामा सहभागि हुन र कम्पनीले वितरण गर्ने बोनस शेयर र नगद लाभांश पाउनेछन् ।
