काठमाडौं । रोयल्टी र नवीकरण बापतको बक्यौता नबुझाएका क्यासिनोलाई सरकारले ५ दिनभित्र चुक्ता गर्न निर्देशन दिएको छ । बारम्बार सूचना जारी गरे पनि अटेरी गरेको भन्दै पर्यटन विभागले बिहीबार अर्को सूचना जारी गरेको हो ।
विभागले बक्यौता रहेका रक इन्टरनेसनल, ह्याप्पी आवर र ओरियन्टल होटल्स (¥याडिसन होटल) लाजिम्पाटलाई ५ दिनभित्रै बक्यौता दाखिला गर्न निर्देशन दिएको हो । विभागले यसअघि कात्तिक ७ गते ३५ दिनको समय दिएर बक्यौता चुक्ता गर्न सूचना जारी गरेको थियो । दोस्रो पटक पुस २७ गते १५ दिनको समय दिएको थियो ।
उक्त समयमा पनि बक्यौता नउठेपछि माघ १९ गते सात दिनभित्र बक्यौता दाखिला गर्न विभागले सूचना सार्वजनिक गरेको थियो । समयमै बक्यौता दाखिला नगरे कानुनबमोजिम कारबाही गर्नेगरी बुधबार संस्कृति, पर्यटन तथा नागरिक उड्डयन मन्त्रीस्तरीय निर्णयसमेत भएको थियो । मन्त्रालयले पछिल्लो समय क्यासिनो सञ्चालनबापतको रोयल्टी र नवीकरण नबुझाएका कम्पनीलाई बारम्बार ताकेता गर्दै आएको छ जसका कारण सरकारलाई सफलता पनि मिलेको छ ।
यसै क्रममा चालू आर्थिक वर्ष अहिलेसम्म रोयल्टी शीर्षकमा ७५ करोड ४५ लाख रुपैयाँ प्राप्त भएको मन्त्रालयले जनाएको छ । सोही प्रयोजनका लागि १४ करोड २० लाख रुपैयाँ बैङ्क जमानत प्राप्त भएको मन्त्रालयले उल्लेख गरेको छ । क्यासिनो सञ्चालकबाट ठूलो मात्रामा बक्यौता रहेपछि मन्त्रालयले माघ २६ गतेको मन्त्रीस्तरीय निर्णयबाट कारबाहीको प्रक्रिया अगाडि बढाएको थियो । उक्त प्रक्रियापछि क्यासिनो सञ्चालक बाँकी बक्यौताका लागि मन्त्रालय सम्पर्कमा आउने क्रम बढेको जनाइएको छ । मन्त्रालयका अनुसार आर्थिक वर्ष २०७६÷७७ सम्म क्यासिनो सञ्चालक कम्पनीहरूले ८४ करोड ८४ लाख ४७ हजार रुपैयाँ रोयल्टी शीर्षकमा बुझाउन बाँकी थियो । त्यस्तै कुमारी चोक तथा केन्द्रीय तहसिल कार्यालयमा एक अर्ब ९० करोड ९९ लाख ५५ हजार लगत कसिएको मन्त्रालयले जनाएको छ। ।
