काठमाडौं । सत्तारुढ पाँचदलीय गठबन्धनबी महानगरपालिका र उपमहानगरपालिकाको भागबण्डामा सहमति जुटेको छ । आज बसेको सत्तारुढ दलका शीर्ष नेताको बैठकले उम्मेदवारको भागबण्डा टुंग्याएको हो ।
सहमति अनुसार अनुसार काँग्रेसले काठमाडौं र ललितपुर र विराटनगरको मेयर पाएको छ । त्यस्तै, माओवादीले भरतपुर, एकीकृत समाजवादीले पोखरा र जनता समाजवादी पार्टीले वीरगञ्जको मेयर पाउनेछ ।
त्यस्तै, भरतपुर र पोखरा महानगरपालिकाको उपमेयरको पद काँग्रेसले पाउनेछ । ललितपुर महानगरपालिकाको उपमेयर माओवादीले पाउनेछ । त्यस्तै, एकीकृत समाजवादीले काठमाडौं महानगरपालिका उपमेयर पाउनेछ । जनता समाजवादी पार्टीले विराटनगरको उपमेयर पाउनेछ ।
उपमहानगरपालिकातर्फ कांग्रेसले धरान, इटहरी, कलैया, बुटवल, तुलसीपुर, नेपालगञ्ज, धनगढीको मेयर पद लिनेछ भने जितपुर सिमरा, घोराही र हेटौंडाको उपमेयर लिनेछ ।
नेकपा माओवादी केन्द्रले जितपुर सिमरा र घोराही उपमहानगरपालिकाको मेयर पद लिनेछ भने धरान र धनगढीको उपमेयर लिनेछ ।
नेकपा एकीकृत समाजवादीले हेटौंडा उपमहानगरपालिकाको मेयर पद लिनेछ भने इटहरी, बुटवल र तुलसीपुरको उपमेयर लिनेछ ।
जनता समाजवादी पार्टीले जनकपुर उपमहानगरपालिकाको मेयर र कलैया र नेपालगञ्जको उपमेयर लिनेछ ।
