काठमाडौं । अपर तामाकोशीको नोक्सानी पौने २ अर्ब रुपैयाँ पुगेको छ । कम्पनीले सार्वजनिक गरेको आर्थिक वर्ष २०७८/७९ को वित्तीय विवरण अनुसार असार मसान्तसम्ममा कम्पनीको नोक्सानी १ अर्ब ८७ करोड रुपैयाँ पुगेको हो । गत वर्ष यस्तो नोक्सानी ५ करोड ३४ लाख रुपैयाँ रहेको थियो ।
असार मसान्तसम्ममा विद्युत बिक्रीबाट ७ अर्ब १७ करोड रुपैयाँ आम्दानी गरेको कम्पनीको जगेडा कोषमा २ अर्ब ७१ करोड रुपैयाँ ऋणात्मक रहेको छ। सोही अवधिमा कम्पनीको वित्तीय आम्दानी ५ अर्ब ६२ करोड ८२ लाख रुपैयाँ ऋणात्मक रहेको छ । जसले गर्दा खुद नोक्सानी पनि बढ्न पुगेको देखिन्छ।
असार सम्ममा कम्पनीले प्राधिकरणलाई विद्युत विक्री गरे वापत ७ अर्ब १७ करोड बराबरको बिल पेश गरेको छ । जसमध्ये प्रधिकरणले २०७९ जेठसम्मको आय वापत ५ अर्ब ५२ करोड रुपैयाँ दिएको छ ।
१० अर्ब ५९ करोड रुपैयाँ चुक्ता पूँजी रहेको यस कम्पनीको ७३ अर्ब ७८ करोड रुपैयाँ दीर्घकालीन र ५ अर्ब ६३ करोड अल्पकालीन ऋण रहेको छ । सोही समयमा कम्पनीको प्रतिशेयर आम्दानी १७ रुपैयाँ ६९ पैसा ऋणात्मक रहेको छ भने प्रतिशेयर नेटवर्थ ७४ रुपैयाँ ३३ पैसा रहेको छ।
