नेपाल एशोसिएसन फर टुर एण्ड ट्राभल एजेन्ट्स (नाट्टा) को आगामी कार्यसमितिका लागि बिहीबार मतदान हुँदैछ । नयाँ कार्यकालका लागि वर्तमान कार्यसमितिका वरिष्ठ उपाध्यक्ष विनय बस्नेत र वर्तमान उपाध्यक्ष रमेश थापा अध्यक्षका प्रत्यासी छन् । उनीहरु दुवैले नयाँ नेतृत्वका लागि प्यानलसहित आफ्नो उम्मेदवारी दिएका छन् ।
यही क्रममा अध्यक्षका प्रत्यासी उम्मेदवार विनय बस्नेतसँग नेपालअर्थले अध्यक्षमा दिएको उम्मेदवारी, जित्ने आधार र निर्वाचित भएको अवस्थामा गर्ने कामका सम्बन्धमा छोटो कुराकानी गरेको छ ।
नेपाल एशोसिएसन फर टुर एण्ड ट्राभल एजेन्ट्स (नाट्टा) को आगामी कार्यकालका लागि उम्मेदवारी घोषणा गर्नुभएको छ, तपाइँको उम्मेदवारीको औचित्य कसरी पुष्टि गर्नुहुन्छ ?
म नाट्टाको वर्तमान कार्यसमितिमा वरिष्ठ उपाध्यक्षको जिम्मेवारीमा छु । वरिष्ठ उपाध्यक्ष नै अर्को कार्यकालको अध्यक्ष बन्ने हाम्रो अग्रजदेखिकै परम्परा हो । विगतको अभ्यासलाई आधार मान्दै पूर्व अध्यक्षज्यूहरुको चाहनामा मैले नयाँ कार्यकालको अध्यक्षको लागि उम्मेदवारी दिएको हुँ । मेरो उम्मेदवारीको प्रमुख कारण यही हो ।
पूर्व अध्यक्षको चाहना अनुसार नै मैले नयाँ कार्यकालमा सर्वसम्मत गर्ने प्रयास पनि गरेको हुँ । तर यो सफल हुन सकेन । तर, व्यवसायिक रुपमा अघि बढ्ने संस्थामा पार्टीगत ढंगबाट अघि बढ्ने प्रयास भएपछि संस्थाको गैरराजनीतिक छवीलाई कायमै राख्न मैले उम्मेदवारी दिनैपर्ने अवस्था बनेको हो ।
मैले सम्पुर्ण विशुद्ध व्यवसायीको प्रतिनिधित्व हुनेगरी टीम बनाएको छु । आगामी दिनहरुमा सबैको साझा एजेण्डालाई सम्बोधन गर्ने र अहिलेको २ वर्षको कार्यकालको यो च्यालेन्जलाई स्वीकार गरेर अगाडि बढ्ने प्रतिबद्धता गरेको छु ।
अहिलेसम्म वरिष्ठ उपाध्यक्षमा रहेर यो कार्यकालमा र नाट्टामा अहिले गर्नुभएका समग्र काम र यसको उपलब्धि के कस्ता छन् ?
कोभिडको बेलामा सबै व्यवसायी साथीहरू प्यानिक भएर के हुन्छ, कसो हुन्छ भनिरहेको बेलामा पनि हामीले बाहिर फिल्डमा आएर काम गयौँ । नेपाल सरकार पर्यटन मन्त्रालयका सचिवज्यू मन्त्रीज्यूसँग गर्ने छलफलहरुमा वरिष्ठ उपाध्यक्षको रुपमा मैले नै नेतृत्व गरिरहेको हुन्छु ।
वर्तमान कार्यकालमा मैले इन्टरनेशनल र डोमेस्टिक क्षेत्र जिम्मेवारी पाएको थिएँ । सो जिम्मेवारी अनुसार इन्टरनेशनल क्षेत्र अन्तर्गत श्रीलंका, बंगलादेश, स्पेन लगायत देशमा प्रोमोसनका कामहरु गरेँ । आन्तरिक पर्यटन प्रर्वद्धनका लागि नाटा प्रदेशसँग सहकार्य गरेर धेरै काम गरेको छु ।
ती कार्यहरुलाई अबको आगामी दिनहरुमा त्यसैलाई निरन्तरता दिने र यो व्यापक रुपमा पर्यटन प्रर्वद्धनमा केन्द्रित भएर जाने मेरो उद्देश्य हो ।
नाट्टाको अध्यक्षका लागि तपाइँलाई मतदाताले विश्वास गर्ने आधार चाहिँ के हो ?
पछिल्लो २४ वर्ष देखि यसमा आवद्ध भएको छु । म कार्यसमितिमा रहँदा वा नरहँदा पनि यो संस्थालाई सहयोग गरेको छु । आफूले पाएका जिम्मेवारीलाई जिम्मेवारीलाई पुरा गरेको छु । मेरो कार्यकालको समयमा गरेको कामहरु सम्पुर्ण पर्यटन व्यवसायी साथीहरुले हेर्नुभएको, बुझ्नुभएको छ ।
त्यसबाहेक म अन्य संघ संस्थामा पनि आवद्ध भएको छु । म यहाँ काम सिक्न भन्दा पनि काम गरेर देखाउन आएको हुँ । विभिन्न संघ संस्थामा महत्वपूर्ण जिम्मेवारी प्राप्त गरिसकेका हुनाले अनुभवी नेतृत्वको रुपमा आगामी नेतृत्वका लागि मलाई मतदाताले विश्वाास गर्नुहुनेछ भन्ने विश्वास छ ।
त्यस्तै मैले पूर्ण व्यवसायिक टीम निर्माण गरेको छु । मैले निर्माण गरेको टीमलाई विश्वास गरेर साथीहरुले हाीलाई थप विश्वास गर्ने आधार बनेको छ ।
तपाइँले जित्ने विश्वास गर्दैगर्दा वर्तमान अध्यक्ष समेत तपाइँको समर्थनमा हुनुहुन्न । अर्का आकांक्षीले पनि तपाइँलाई तपाइँको प्रतिस्पर्धीलाई समर्थन दिएर उम्मेदवारी फिर्ता लिनुभयो । चुनौती थपिएजस्तो लाग्दैन ?
चुनौती त मैले स्वीकार गरिसकेको छु । मेरो विपक्षीको अहिलेको अध्यक्षको कुरा गर्दा पछिल्लो २६ महिनामा उहाँलाई सफल बनाउन कसरी कति काम गरियो भन्ने कुरा उहाहरुलाई अवगत नै छ । मैले संस्था र उहाँको नेतृत्व लाई स्वीकार गरेर अगाडि बढेको मान्छे हो ।
तपाइँले सहयोग गर्दागर्दै पनि वर्तमान अध्यक्ष तटस्थ समेत नबसेर तपाइँको विपक्षीलाई समर्थन गर्ने अवस्था कसरी आयो त ?
त्यसको उत्तर त उहाँले नै दिने हो । मेरो बुझाइमा उहाँको समर्थन मलाई छ भन्ने नै हो । यदि तपाइँले भन्नुभएजस्तो उहाँ विपक्षीकै प्यानललाई सहयोग गर्नुभएको छ भने उहाँ राजनीतिक रुपमा अघि बढ्नुभएको छ ।
पर्यटन क्षेत्र गैरराजनीतिक क्षेत्रमा पनि लोकतान्त्रिक समूह, प्रगतिशील समुह भनेरे विभाजन हुने यो पद्धतिलाई चाहिँ कसरी हेर्नुहुन्छ ?
राजनीतिक आस्था सबैको हुन्छ तर, व्यवसायिक टीममा यो देखिनु हुँदैन । मेरो कुरा गर्नुहुन्छ भने म विशुद्ध व्यवसायिक रुपमा नाट्टामा क्रियाशील रहँदै आएको छु । आजसम्म कुनै पनि काममा मेरो तर्फबाट यो संस्थामा राजनीतिकरण भएको छैन र गर्न दिएको पनि छैन ।
यो क्रममा मैले विभिन्न अवरोधको सामना समेत गरेको छु । यो संगठनको व्यवसायिकताको लागि भोलिका दिनमा पनि यसका लागि म निरन्तर लागिरहनेछु । पुर्वअध्यक्षहरुको ठूलो समूह छ जसले नाट्टालाई पुर्ण व्यवसायिक बनाउनुपर्छ भन्नुभएको छ । उहाँहरुको मान्यता अनुसार संस्थालाई अघि बढाउने प्रतिवद्धता व्यक्त गरेको छु । त्यसैले उहाँहरुले मलाइ समर्थन गर्नुभएको छ ।
तपाँइलाई खुलेर समर्थन पुर्वअध्यक्ष को–को हुनुहुन्छ ?
मैले सम्मानित गनुपर्ने पूर्वअध्यक्षहरुलाई मैले अहिले नाम तोकेर विवादित बनाउन चाहन्न । पर्यटन मन्त्रालय गठन नहँुँदै यसको महत्व बुझेर आजभन्दा ५५ वर्ष अगाडि संस्था स्थापना गरेका अग्रजहरुलाई विवादमा ल्याउने कुरा म अध्यक्ष उठ्दा वा नउठ्दाखेरि पनि गर्नु हुँदैन भन्नेमा म दृढ छु ।
अग्रजहरुको चाहान यो संस्था विशुद्ध व्यवसायिक हुनुपर्छ र त्यस्तै नेतृत्व आउनुपर्छ भन्ने छ । र, त्यो मान्छे म हुँ । यसको अर्थ मेरो पछाडि सम्पुर्ण पूर्वअध्यक्षहरु हुनुहुन्छ भन्ने मेरो विश्वास रहेको छ ।
४४९ जना मतदातामध्ये कतिजनाले समर्थन गनुहुन्छ जस्तो लाग्छ ?
म त विशुद्ध व्यवसायिक रुपमा आएको छु । मैले वरिष्ठ अध्यक्ष हुदाँखेरि मैले मेरो कार्यक्षमता, मेरो नेटवर्कको हिसाबले मैले भोलि संस्थाको प्रतिनिधिको रुपमा सरकार र विदेशी संस्थासमेतसँग बसेर सहकार्य गर्नसक्ने कुरामा सबै मतदाता मप्रति विश्वस्त हुनुहुन्छ भन्ने लाग्छ । त्यसैले सबै उम्मेदवार मेरो पषमा हुनुहुन्छ भन्ने हो ।
तर, प्यानल नै बनेर दुई पक्ष भएपछि सबै भोट नआउला । कति आउँछ भनेर मैले अहिले बोल्नुभन्दा त्यसको जिम्मा मतदाता साथीहरुलाई नै छाड्नु उपयुक्त होला ।
