काठमाडौं । पुष्पा भुसाल प्रतिनिधिसभाको उपसभामुखमा निर्वाचित भएकी छिन् । शुक्रबार बसेको प्रतिनिधिसभा बैठकले भुसाललाई उपसभामुखमा निर्वाचित गरेको हो ।
आजको मत विभाजनमा २४२ जना सहभागी भएका थिए । उनलाई उपसभामुख बनाउने पक्षमा भएको मत विभाजनमा १४८ सांसदले पक्षमा मत दिएपछि सभामुख अग्निप्रसाद सापकोटाले भुसाल उपसभामुखमा निर्वाचित भएको घोषणा गरे ।
प्रस्तावको विपक्षमा ९३ मत पर्दा १ सांसद तटस्थ बसेका थिए । काँग्रेस नेतृ भुसाललाई गठबन्धनले उपसभामुखको उम्मेदवार बनाएको हो ।
यसअघि उपसभामुख रहेकी शिवमाया तुम्बाहाम्फेले राजीनामा दिएपछि उपसभामुख पद रिक्त थियो । झण्डै २ वर्षको रिक्ततापछि चालु संसदले दोस्रो उपसभामुख पाएको हो ।
अब यो संसदको कार्यकाल करिब ५ महिना मात्रै बाँकी छ । अब भुसालले सो अवधिसम्म उपसभामुखको भूमिका निर्वाह गर्नेछिन् । उपसभामुख संवैधानिक परिषद्को सदस्य समेत रहने भएकोले यो पदलाई महत्वपूर्ण मानिन्छ ।
