काठमाडौँ । गैरआवासीय नेपालीलाई इन्भेस्टमेन्ट कम्पनीमा विदेशी लगानी भित्र्याउन सीमा लागु नहुने भएको छ । उद्योग वाणिज्य तथा आपूर्ति मन्त्रालयले राजपत्रमा सूचना प्रकाशन गरेर नेपाल सरकार र गैरआवासीय नेपालीको संयुक्त लगानीमा स्थापना भएको इन्भेस्टमेन्ट कम्पनीमार्फत नेपालमा लगानी गर्ने गैरआवासीय नेपालीलाई विदेशी लगानीको न्यूनतम सीमा नलाग्ने व्यवस्था गरेको हो ।
यसअघि नेपालमा लगानी ल्याउन न्यूनतम सीमा दुई करोड रुपैयाँ निर्धारण गरेको थियो । गैरआवासीय नेपालीलाई इन्भेस्टमेन्ट कम्पनीमा लगानी गर्न सीमा नलाग्ने व्यवस्थाले सानो सानो लगानी भित्र्याउन सहज हुने बताइएको छ ।
विदेशी लगानी तथा प्रविधि हस्तान्तरण ऐन २०७५ ले दिएको अधिकार प्रयोग गरी गत वर्ष कात्तिक २८ मा सरकारले विदेशी लगानीको न्यूनतम सीमा ५ करोड रुपैयाँबाट घटाएर दुई करोडमा झारेको थियो । न्यूनतम लगानीको सीमा ५ करोड रुपैयाँ राख्दा साना लगानीकर्तालाई नेपालमा लगानी गर्न कठिन हुन थालेपछि लगानीको सीमा कम गरिएको थियो ।
लगानीको सीमा घटाएसँगै नेपालमा विदेशी लगानी बढ्दै गएको हो । सरकारले नीतिगत र प्रशासनिक सुधार गरेसँगै चालुु आवमा विदेशी लगानीमा सुधार आएको तथ्याङ्कले देखाएको छ । नेपाल राष्ट्र बैङ्कको तथ्याङ्क अनुसार चालुु आर्थिक वर्षको कात्तिक महिनासम्म ३ अर्ब ६४ करोड बराबरको वैदेशिक लगानी भित्रिएको राष्ट्र बैङ्कको तथ्याङ्क छ । गत आर्थिक वर्षको सो अवधिमा ४३ करोड रुपियाँ बराबरको वैदेशिक लगानी भित्रिएको थियो । मुलुकमा आर्थिक गतिविधि लयमा आउन थालेपछि विदेशी लगानीमा सुधार हुुँदै आएको बताइएको छ ।
