काठमाडौं । हिमाली जिल्ला हुम्लामा दुई दिनदेखि हवाई सेवा अवरुद्ध हुँदै आएको छ । बिहान नेपालगञ्ज विमानस्थलमा बाक्लो हुस्सु लाग्नु र दिउँसो सिमकोटमा हावा लाग्ने भएका कारण हवाई सेवा अवरुद्ध हुँदै आएको हो ।
हवाई सेवा अवरुद्ध भएपछि सिमकोट विमानस्थलमा यात्रुको चाप बढिरहेको छ । सडक यातायात नजोडिएका कारण हवाई मार्गबाट यात्रा गर्नुपर्ने माथिल्लो हुम्लाका यात्रुलाई बाध्यता छ ।
बिहानभरि नेपालमा बाक्लो हुस्सु र कुहिरो लाग्नु, दिउँसो बाह्र, एक बजेपछि सिमकोट विमानस्थलमा हावा लाग्ने भएकाले हवाई सेवा अवरुद्ध हुँदै आएको सिमकोट विमानस्थलले जनाएको छ ।
यसबाट नेपालगञ्ज र सुर्खेतबाट सिमकोट आउने यात्रु र सिमकोटबाट नेपालगञ्ज र सुर्खेत झर्ने यात्रु मर्कामा परेका छन् । दुई दिनयता नेपालगञ्जबाट सीता, समिट र तारा एयरका जहाजले सिमकोटका लागि उडान भर्ने तयारी गरे पनि त्यो सम्भव हुन सकेको छैन ।
