काठमाडौं । अर्थमन्त्री डा प्रकाशशरण महतले विश्व बैंकले जुनको तेस्रो साता नेपालमा लगानी सम्मेलन गर्ने बताएका छन् । बजेटको अर्धवार्षिक समीक्षाका क्रममा महतले उक्त जानकारी गराएका हुन् ।
यो सम्मेलनमा विश्वभरका ९२ वटा देशका प्रतिनिधि नेपाल आउने अर्थमन्त्री डा.महतले बताए । उनले भने, ‘सम्मेलनमा विश्व बैंकका अध्यक्षसहित विश्वभरका ९२ वटा देशका प्रतिनिधि नेपाल आउँछन् ।’ यो सम्मेलन नेपालमा आयोजना गर्नका लागि नेपाल सरकारले विश्व बैंकलाई पत्र लेखेको थियो ।
नेपालको पत्र पाएसँगै सुरुमा सैद्धान्तिक सहमति जनाए पनि पत्रको जवाफ नै आइसकेको अर्थमन्त्री डा.महतले बताए । अर्थमन्त्री महतले यो तहको उच्चस्तरीय भेला अहिलेसम्म नेपालमा आयोजना नभएको बताए । ‘यो पहिलो त्यस्तो भेला हुनेछ,’ उनले भने, ‘जसमा विश्व बैंकका अध्यक्षसहित विश्वभरका ९२ वटा मुलुकका प्रतिनिधि नेपालमा आउनेछन् ।’
यो सम्मेलन आयोजना भएपछि नेपालमा लगानीको बाटो अन्तर्राष्ट्रियरुपमा खुल्ने अर्थमन्त्री महतको भनाई छ । यो चालू वर्षको लागि जेठ १५ मा अर्थमन्त्री महतले घोषण गरेको १७ खर्ब ५१ अर्ब ३१ करोड रुपैयाँबाट १२.६२ प्रतिशतले बजेटको आकार घटेको हो ।
अर्थमन्त्रीले बजेटको आकार घटाउँदा सबैभन्दा धेरै पूँजीगततर्फको बजेट घटाएका छन् ।
