काठमाडौं । पोखरा–जोमसोम हवाइ उडान सेवा साढे दुई महिनापछि सञ्चालन भएको छ । प्रतिकुल मौसमका साथै पर्यटकीय अफसिजनका कारण रोकिएको हवाइ सेवा शुक्रबारदेखि सञ्चालनमा आएको हो ।
हिउँदयामको मौसमसँगै पर्यटक अफसिजनका कारण तारा एअरलाईन्सले मंसिर १० गते र समिट एअरलाईन्सले मंसिर २० गतेदेखि पोखरा–जोमसोम हवाइ सेवा उडान बन्द गरेका थिए ।
मुस्ताङमा पोखरा-जोमसोम हवाइ सेवा सञ्चालना आएसँगै जोमसोम विमानस्थलको पर्यटकीय चहल-पहल बढेको छ । अनुकुल मौसम सुरु भएसँगै सदरमुकाम जोमसोम भारतीय तथा आन्तरिक पर्यटकको आगमन बढेको छ । धेरै भारतीय पर्यटक सडकमार्ग हुँदै मुक्तिनाथ दर्शनका लागि आउने गरेका छन् । गतवर्ष हवाइ तथा सडकमार्ग हुँदै करिव ९० हजार पर्यटक मुस्ताङ आएका थिए ।
यसअघि जिल्ला प्रहरी कार्यालय मुस्ताङले जोमसोम विमानस्थलको सरसफाई तथा धावनमार्गमा उम्रिएका घाँसबिरुवा पन्छ्याउने काम गरिएको थियो ।
