काठमाडौं । चालू आर्थिक वर्षको पहिलो त्रैमासमा वाणिज्य बैंकको नाफा २१.६३ प्रतिशतले बढेको छ । बैंकहरुले सार्वजनिक गरेको वित्तिय विवरण अनुसार आर्थिक वर्ष २०८१/८२ को पहिलो तीन महिनामा यस्तो अवस्था देखिएको हो ।
गत आर्थिक वर्ष २०८०/८१ को पहिलो त्रैमासमा २० वाणिज्य बैंकहरुले १३ अर्ब ३४ करोड रुपैयाँ नाफा गरेका थिए । उक्त नाफा यसपटक २१.६३ प्रतिशतले बढेर १६ अर्ब २३ करोड रुपैयाँ पुगेको हो ।
हाल सञ्चालनमा रहेका २० वाणिज्य बैंकहरु मध्ये १२ बैंकको नाफा बढेको छ । यो अवधिमा नाफा वृद्धि गर्ने बैंकहरुमा सिद्धार्थ, लक्ष्मी सनराईज, नेपाल बैंक, कुमारी, नेपाल एसबीआई, एभरेष्ट, नबिल, ग्लोबल आईएमई, एनएमबी, प्राइम, स्ट्याण्डर्ड चाटर्ड र प्रभु बैंक रहेका छन् । अन्य बैंकहरु नेपाल इन्भेष्टमेन्ट मेगा, माछापुच्छ्रे, सिटिजन्स, सानिमा, हिमालयन, राष्ट्रिय वाणिज्य र एनआईसी एशिया बैंको नाफा भने घटेको छ ।
गत आर्थिक वर्षको पहिलो त्रैमासमा घाटामा गएको कृषि विकास बैंक यसपटक नाफामा गएको छ ।
कसको कति नाफा ?
नाफा बढेका वाणिज्य बैंकहरु मध्ये सिद्धार्थ बैंकको नाफा सर्वाधिक ७९१.४२ प्रतिशतले बढेको छ । अघिल्लो आर्थिक वर्षमा ४ करोड २८ लाख रुपैयाँ नाफा गरेको सो बैंकको नाफा यसपटक बढेर ३८ करोड २० लाख रुपैयाँ पुगेको छ । त्यस्तै, लक्ष्मी सनराईजको ४२०.५२ प्रतिशत, नेपाल बैंकको ३२२ प्रतिशत र कुमारी बैंकको नाफा ३०८ प्रतिशतले बढेको छ ।
चालू आर्थिक वर्षको पहिलो त्रैमासमा नबिल बैंकले सर्वाधिक २ अर्ब ५ करोड रुपैयाँ नाफा कमाएको छ । त्यस्तै, ग्लोबल आईएमई बैंकको नाफा पनि १ अर्ब ५१ करोड भन्दा बढी रहेको छ ।
सात बैंकको नाफा घट्यो
समीक्षा अवधिमा ७ वाणिज्य बैंकको खुद नाफा भने घटेको छ । यसरी नाफा घटाउनेमा नेपाल इन्भेष्टमेन्ट मेगा बैंक, माछापुच्छ्रे बैंक, सिटिजन्स बैंक, सानिमा बैंक, हिमालयन बैक, राष्ट्रिय वाणिज्य बैंक र एनआईसी एशिया बैंक रहेका छन् । जसमध्ये एनआईसी एशिया बैंकको ८९.०६ प्रतिशत घटेको छ भने राष्ट्रिय वाणिज्य बैंकको ८२.४० प्रतिशतले घटेको छ ।
