काठमाडौं । स्वास्थ्य बीमा बोर्डले बीमा कार्यक्रमबाट २५ हजार रुपैयाँ बराबरको ओपीडी सेवा पाउने सुविधा शुक्रबारदेखि लागू गरेको छ ।
बीमा गरेका हरेक परिवारले अधिकतम २५ हजार ओपीडी र बाँकी ७५ हजार अस्पतालमा भर्ना तथा आकस्मिक सेवाका लागि प्रयोग गर्न सकिने गरी छुट्याइएको स्वास्थ्य बीमा बोर्डले जनाएको छ । बीमितले पाउँदै आएको १ लाख रुपैयाँको उपचार सेवा सुविधा नघटाइएको पनि जनाएको छ ।
बीमा कार्यक्रमअन्तर्गत ३ हजार ५ सय रकम बीमितले बुझाएमा पाँच जना परिवारले कुल १ लाख रुपैयाँ बराबरको उपचार सेवा पाउने सीमा यथावत् राखिएको जनाइएको छ ।
बोर्डले अनावश्यक रूपमा हुने ओपीडी सेवाको प्रयोग र दोहोरोपन रोक्न तथा गम्भीर, जटिल र ज्यान जोखिममा पर्ने रोगको उपचारका लागि स्रोत सुनिश्चित गर्नका लागि सेवाको रकम छुट्याएकाले त्यसैअनुसार प्रयोग गर्न पनि आग्रह गरेको छ ।
