काठमाडौं । नेपालमा रेम्डेसिभिर औषधि उत्पादन गर्न औषधि व्यवस्था विभागले अनुमति दिएको छ ।
कोभिड–१९ सङ्क्रमितको उपचारका लागि रेम्डेसिभिर औषधि प्रयोग गरिन्छ ।
वीरगञ्जस्थित नेशनल हेल्थ केयरले रेम्डेसिभिर औषधि उत्पादन
गर्न अनुमति पाएको विभागका सूचना अधिकारी सन्तोष केसीले जानकारी दिए ।
औषधि उत्पादन गर्ने कम्पनीका सबै संरचना हेरेर र उत्पादन गर्ने सक्ने भएपछि मात्र अनुमति दिइएको जनाइएको छ ।
यसअघि नेपालमा सो औषधि भारत र बङ्गलादेशबाट ल्याउने गरिएको थियो । औषधिको मूल्य करीब रु पाँच हजार पर्छ ।
नेशनल हेल्थ केयरका उपाध्यक्ष अजय पाण्डेले अनुमति पाइसकेपछि चीनबाट कच्चा पदार्थ ल्याउने तयारी गरिएको जानकारी दिए ।
यही जेठ १७ गतेसम्म औषधिका लागि कच्चा पदार्थ ल्याइने र १५ दिनपछि उत्पादन गरेर बजारमा पु¥याइने बताइएको छ ।
