काठमाडौं । तेस्रो संस्करणको नेपाल प्रिमियर लिग (एनपीएल) आजदेखि सुरु हुँदै छ । प्रतियोगिताको उद्घाटन खेलमा साविक विजेता लुम्बिनी लायन्स र उपविजेता सुदूरपश्चिम रोयल्स आमने सामने हुनेछन् ।
बेलुकी ५ बजे कीर्तिपुरस्थित टियु मैदानमा सुरु हुने खेलका समपूर्ण टिकट बिक्री भइसकेको छ । करिब एक महिनासम्म चल्ने प्रतियोगिताका लागि आयोजक नेपाल क्रिकेट संघ (क्यान) ले पहिलो पटक डीआरएस प्रणाली लागू गरेको छ । यस्तै, विदेशी स्टार खेलाडीहरूको आगमनले प्रतियोगितालाई थप स्तरीय बनाएको छ ।
प्रतियोगितामा आठ टोलीको सहभागीता रहेको छ । एनपिएलको पहिलो सिजनको उपाधि जनकपुर बोल्ट्सले जितेको थियो । दोस्रो सिजनमा लुम्बिनी लायन्स च्याम्पियन बनेको थियो ।
प्रतियोगिताको विजेताले १ करोड ५० लाख तथा उपविजेताले ८० लाख रुपैंया प्राप्त गर्नेछन् । यस्तै, तेस्रो र चौथो हुने टोलीले क्रमशः ४० र ३० लाख प्राप्त गर्ने क्यानले जनाएको छ ।
