काठमाडौं । बैंक तथा वित्तीय संस्थाले चालु आर्थिक वर्षको तेस्रो त्रैमासको वित्तीय विवरण प्रकाशित गरिसकेका छन् । यो अवधिमा अधिकांश बैंकको नाफा बढेको छ । केही बैंकको नाफा घटे पनि नाफाको अवस्था सन्तोषजनक नै छ ।
तर, बैंकहरुको वित्तीय विवरणमा वितरणयोग्य नाफा भने खुद नाफाभन्दा निकै नै कमसम्म रहेको देखिएको छ ।
सनराइज बैंकको वितरणयोग्य मुनाफा खुद नाफाको २८ प्रतिशत मात्रै छ । नाफाभन्दा वितरणयोग्य नाफा ५० प्रतिशत अर्थात् आधा भन्दा कम भएका वाणिज्य बैंकको संख्या ४ वटा छ ।
तर नबिल बैंक एकमात्रै बैंक हो, जसको वितरणयोग्य नाफा खुद नाफाभन्दा धेरै छ । बैंकले चालु आर्थिक वर्षको ९ महिनामा ३ अर्ब ६७ करोड रुपैयाँ नाफा कमाएको थियो । बैंकको वितरणयोग्य नाफा भने ३ अर्ब ८० करोड रुपैयाँ छ ।
रेगुलेटरी रिजर्भमा राख्नुपर्ने रकम १९ करोड रुपैयाँ फिर्ता भएको र अन्य रिजर्भ पनि ९ करोडले फिर्ता आएपछि लाभांश क्षमता नाफाभन्दा माथि पुगेको हो ।
