भक्तपुर । गत आर्थिक वर्ष २०८२ ८३ मा भक्तपुर जिल्लामा चालु र पूँजीगत गरी ४२ अर्ब २३ करोड रुपैयाँ खर्च भएको छ। जिल्लाले ५१ अर्ब ४९ करोड रुपैयाँ खर्च गर्ने अख्तियारी पाएकोमा ८२ प्रतिशतभन्दा बढी रकम खर्च गर्दै अन्य जिल्लाको तुलनामा उल्लेखनीय वित्तीय प्रगति हासिल गरेको हो।
कोष तथा लेखा नियन्त्रण कार्यालय भक्तपुरका प्रमुख महेश कुमार दाहालका अनुसार संघ र स्थानीय तह अन्तर्गतका कार्यालयको चालुतर्फ ४० अर्ब ४७ करोड रुपैयाँ खर्च गर्ने अख्तियारी प्राप्त भएको थियो। त्यसमध्ये ३५ अर्ब ५ करोड रुपैयाँ अर्थात ८७ दशमलव ६५ प्रतिशत खर्च भएको छ। त्यसैगरी पूँजीगततर्फ ११ अर्ब २ करोड रुपैयाँ विनियोजन गरिएकोमा ७ अर्ब १८ करोड रुपैयाँ अर्थात ६५ दशमलव १५ प्रतिशत खर्च भएको कार्यालयले जनाएको छ।
भक्तपुरमा रहेको बीपी राजमार्ग आयोजना, सूर्यविनायक–धुलिखेल सडक आयोजना, केन्द्रीय आयोजना कार्यान्वयन इकाई ‘सीएलपीआईयू’ तथा संघीय खानेपानी तथा ढल व्यवस्थापन कार्यालयले मात्रै एक–एक अर्ब रुपैयाँभन्दा बढी खर्च गरेका कारण जिल्लाको समग्र खर्च उल्लेखनीय बनेको दाहालले बताए। उनका अनुसार राष्ट्रिय स्तरमा पूँजीगत खर्च अपेक्षाअनुसार हुन नसके पनि भक्तपुरले भने अन्य जिल्लाको तुलनामा तुलनात्मक रूपमा राम्रो प्रगति गरेको छ। जिल्लाका लागि विनियोजन भएको रकममध्ये ९ अर्ब २३ करोड रुपैयाँ भने खर्च हुन सकेन।
राष्ट्रिय तथ्यांकअनुसार गत आर्थिक वर्षमा देशभर चालुतर्फ १० खर्ब ४४ अर्ब रुपैयाँ खर्च भएको छ। तर पूँजीगततर्फ भने १ खर्ब ९० अर्ब रुपैयाँ मात्रै खर्च भएको छ, जुन कुल विकास बजेटको ४६ दशमलव ७९ प्रतिशत मात्र हो। यस्तो अवस्थामा भक्तपुरको ६५ प्रतिशतभन्दा बढी पूँजीगत खर्च राष्ट्रिय औसतभन्दा उल्लेखनीय रूपमा माथि देखिएको छ।
