काठमाडौँ- साताको अन्तिम दिन शेयर बजार ठूलो अंकले ओरालो लागेको छ । बिहीबार सेयर बजार सूचक नेपाल स्टक एक्सचेञ्ज (नेप्से) खुल्नेबित्तिकै पहिलो नेगेटिभ सर्किट लागेको बजारमा मध्याह्न पौने १२ बजे दोस्रो नेगेटिभ सर्किट लागेको हो ।
जेन-जीका नाममा गत भदौ २३ र २४ गते देशभर भएको विध्वंसक प्रदर्शनपछि पहिलो पटक खुलेको शेयर बजार राताम्य भएको हो । यसअघि खुलेको दुई मिनेटमै पहिलो सर्किट ब्रेक लाग्दा बजार २० मिनेटलाई बन्द भएको थियो ।
बजार खुलेको दुई मिनेटभित्रै १०७.०४ अंक अर्थात् ४ प्रतिशतले घटेर पहिलो नकारात्मक सर्किट लाग्दा लगानीकर्तामा निराशा छाएको छ ।
२० मिनेट रोकिएर खुलेको बजारमा १३३.६१ अंक अर्थात् ५ प्रतिशतले कारवबार ओरालो लाग्दा अर्को नकारात्मक सर्किट ब्रेक लागेको छ ।
दोस्रो नकारात्मक सर्किट लागेसँगै नेप्से १३३.६१ अंकले घटेर २५३८.६३ बिन्दुमा ओर्लिएको छ । दोस्रो नकारात्मक सर्किट ब्रेकपछि बजार ४० मिनेटलाई रोकिएको छ ।
नियमअनुसार बजार खुलेको एक घण्टाभित्र बजार परिसूचक नेप्से ४ प्रतिशतले घट्दा वा बढ्दा सर्किट लाग्छ ।
त्यसपछि बजार खुलेको दोस्रो घण्टाभित्र पाँच प्रतिशतले घटे वा बढे ४० मिनेटका लागि कारोबार रोकिन्छ । उता ६ प्रतिशतले बजार घट्दा वा बढ्दा त्यो दिन बजार नै बन्द हुने नियम छ ।
