काठमाडौं । सोमबार नेपाल स्टक एक्स्चेञज परिसूचक (नेप्से) सामान्य अंकले बढेको छ । आज नेप्से ३.३५ अंकले बढेर २७५८.७५ विन्दुमा पुगेको हो । आइतबार नेप्से ११.६६ अंकले बढेर २७५५.४० विन्दुमा पुगेको थियो ।
नेप्से ३ अंकले बढ्दा बजारमा ९० कम्पनीको शेयरमूल्य बढेको छ । आज १४५ कम्पनीको शेयर मूल्य घटेको छ भने ९ कम्पनी स्थिर छन् । आज गार्डियन माइक्रो लाइफ इन्स्योरेन्स कम्पनीको शेयरमूल्यमा सकारात्मक सर्किट लागेको छ भने विन नेपाल लघुवित्तको शेयरमूल्यमा नकारात्मक सर्किट लागेको छ ।
बजारमा रहेका १३ उपसमूहरुमध्ये आज बैंकिङ, इन्भेष्टमेन्ट, म्यानुफ्याक्चरिङ एण्ड प्रोसेसिङ र अन्य उपसमूह बाहेकका अन्य ९ उपसमूहको सूचक घटेको छ ।
नेप्से परिसूचक बढ्दा पनि आज कारोबार रकम भने घटेको छ । आज बजारमा ११ अर्ब ८ करोड रुपैयाँ बराबर रकममा २ करोड ११ लाख १० हजार कित्ता शेयर कारोबार भएको छ । अघिल्लो दिन नेप्सेमा ११ अर्ब ४७ करोड रुपैयाँ बराबर रकमको कारोबार भएको थियो ।
